[حسن الحاجبي]

سولني ولدي على الرسام وما صبت جواب
بعتو و بقيت فالندامة عامي لبصار
ضيعت مقام والديا هذا مكتاب
الناس تعلي فلبني وانا بعت الدار
و اليوم الشوق هزني نبكي عند الباب
نبوس العتبة الطاهرة نتفكر لوكار
هنا جريت و هنا جريت
هنا حبيت وهنا حبيت
هنا حسيت بالدفا و قريت فاللوح و الكتاب
هنا عشت ايام الصفا و عشقت بنت الجار
من فراقك يا دار الجدود
سالت دمعة على الخدود
من فقد اللي غابو تحت اللحود
تفكرت اللامة ولحباب
و العشرة وزيارة لصحاب
و الآلة و العود والرباب
و الكمان يجاوبو جواب
و الخصة تتكلم بالصواب
ماها يجري بلا حساب
تفكرت القعدة مرتبة
و لشفار تقيلة مهدبة
و العين السودة محجبة تحجاب
ياحسرة على ايام الرياض
و روايح الحنة والخواض
و الحبق مغروس فلحواض
صواني و مقارج النحاس
بلار وفضة بلا قياس
و الماموني و لقواس
طلامط و لحايف الحرير
وخوامي كمخة بالتكرير
وانا غري باقي صغير
نلعب نقفز فوق السرير
سيدي ربي دير لي الخير
برد ناري دمعي غزير
سلمت في داري و قلبي حسير


حسن الحاجبي